CULTURA - SARIWINAKTUQITA
Jumax Yakayak jamach’in pacha yatiyirïtap yatiyätati…
Publicado el 03/02/2012

¿SABÍAS QUE EL PÁJARO CARPINTERO EN LA CULTURA AYMARA ES SÍMBOLO DEL PRONÓSTICO DE TIEMPO Y PREDICCIÓN?

Jakayak jamach’ix (pájaro Carpintero) Familia Pícidos orden de los Piciformes uka tamankiriwa, niya pä patak kastanakaw samitsipans jach’a jisk’a tansatsipans utji. Sutipas, samipas mäwjat mawjaruw mayjt’araki.


Sutipa (etimología de su nombre)

Aka jamach’ix yak…yak…yak… sasaw alwas, urus ukjamaraki jayp’us jawir thiyanakana, ch’utu patxanakan wäli warari; ukataw achachil awichanakax YAKAYAKA sutiñchapxatayna.

Samipa 'color'

Niya q’illu ch’ikhükaspas ukjamawa, taqpach phuyunakapax q’illump niy ch’ikhump kittatawa. Surupasti jach’pach ch’iyararakiwa, p’iqi qhipäxapanx mä jisk’a wila-chupik saminiwa; kayunakapas, sillunakapas ch’iyar qhana k’awunakawa. Ukampis jasakiw pirqanakar jalkatas jat’thapisi, janiw jasak jalaqtkaspati.


Kawkins jaki 'hábitat'

Suni pata pampana, qhirwanakan ukjamaraki junt’u uraqinakan kawkjanti jawiranakax utjki ukawjanakan utjasiriwa, Ukjamarus janiw jach’a tans jamach’ikiti jan ukasti tantiypach tansakiwa.

Qhawqhs k’awni 'incubación de huevo'

Maran maykutikiw k’awni, jawiranakan jupan surupamp p’iysut p’iyanakar tapacht’asisina. K’awnapasti payakiwa, janq’u saminakani, janirakiw jach’anakäkisa jisk’pachanakakiwa.


Kuns manq’asi 'alimentación'

Yakayakax uraq manqhan kunayman utjasir jach’ jisk’a laq’unak manq’asi, jach’a ch’iyar ari surupampiw may waysusin jank’ak sajsantaraki. Yaqhippachanakax t’ula ukjamaraki pastunakan jathanakaps manq’asirakiwa.

Kunjams jalnaqi 'vuelo'

yaqha jamach’inakatsipans mayjaw jali, uñch’ukiripatakix uma qhullch’umïkaspas ukjamaw uñjasi, jan ukax saraksnawa: patan manqhan jali, janiw yaqha jamach’inakjam aliqaq jalkiti. Ukat janirakiw añch alayäms jalkarakiti.

Aychapax qullarakiwa 'medicina'

Yakayak aychax wali qullawa: kayu usutaki (reumatismo), p’iqi muyutaki, wila sirkhunakataki (várices) ukjamaraki katja usunakataki (enfermedades de la naturaleza) yaqha usunakampitaki. Aychap manq’antasax jank’akiw usunakat waliptxañ sapxiw yatxatatanakaxa.

Pacha qhanañchiri 'indicador del tiempo'

Yakayakax pach qhanañchañs yatirakiwa. Thaya urüñapatakixa, alwatanakax willka tata jalski ukjax k’ar…k’ar…k’ar… sasaw walja pachanak niy ukjat niy ukjat ch’utu patxanakan sayt’asisa, jawir thiyanakan sayt’asis alaxpach uñtas k’arariñ yati.

Yatiyiri 'pronóstico'

Aka jamach’ix kun uñjasas jank’akiw yatiyaraki. Kunapachati tiwularus, anurus, titi phisirus, jan ukax yaqha jan uñt’at uywanakarus uñji ukapachax wäl warari, yak…yak…yak… sasa, yaqhippachax uks aks jan samart’as jalnaqi. Ukax sañ muniwa: “uywanakaw ukjanakan sarnaqi, amuyasipxam sapxistuwa”.

Qhiñchha/wati 'símbolo de predición de mal augurio'

  • Kunapachati uta pirqanak p’iyski ukjax jan waliwa, mä wilamasi jiwañapatakiw sapxiwa, yaqhipanakax jaqimp k’arintayasiñatakiw sapxarakiwa, yaqhipanakasti jayar sarxañatakiw sapxarakiwa.
  • Kunapachati, mayni wila masisas usuntat jikxataski ukjax akatjamat uta jak’ar jalnuqasin jank’akiw uraq manqhar surup mä qhawqha pachanak chhuqt’i, ukax usut wilamasi jiwañapatakiwa.

Jichhapachanakan janikiw añchäxiti ‘peligro de extinción’

Yaqhawjanakan yakayak jamach’ix janikiw añch utjxiti, pachaw sapürunjam mayjt’aski ukjamatjamaw juk’akïxi, mañq’añanakapas janikiw utjxiti. Yaqhippachax pakarakiw may katjasin manq’antxi, ukat phisitunakas, tiwulas manq’antakirakiwa; jaqis qalamp jaqt’asin jiwayxakirakiwa…

Pacha yatiyirinakat yatxatt’añax wali askiwa, ukjamarus kunanakati pachamama uraqisan utjki ukanakat yatipxañanakasa. Uywanakas, jamach’inakas sum pachatuqita, jakäwisats yatiyapxistuxa; ukax jiwasan amuyasiñatakiwa, jan walinakar jan puriskañataki.

¡Markachirinaka, jamach’inakaru, uywanakar jiwayañax janiw askïkiti, jupanakax jiwasjam jakäwinipxarakiwa!

Gladys Salgado

Jilïr jila kullakanakar jiskxatt’ata

Isaac Salgado Condori, 57 marani (provincia Pacajes)

Rebeca de Salgado, 78 marani (provincia Pacajes)

Felipa vda. de Choque, 79 marani (provincia Pacajes)

Dionicio Salgado Chino, 82 marani (+) (provincia Pacajes)

Pankanak ullakipt’ata

http://www.avesdelima.com/carpintero_andino.htm

Jamuqa

http://www.amazonialodge.com/Andean_Flicker.jpg

http://1.bp.blogspot.com/_PIu41zviSTU/TLwqo0ZnraI/AAAAAAAAATo/W7b3WdKr8BY/s1600/18+Carpintero+andino+n%C2%BA+4+(Lago+Juni%CC%81n-Peru%CC%81+3-8-10).jpg

http://www.avesdelima.com/fsierra/Carpintero%20Cuello%20Negro%20Black-necked%20Woodpecker%20Colaptes%20atricollis%20Allasi07%20back%202.jpg

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia