SOCIEDAD - MARKACHIRINAKTUQITA
San Gabriel radio: 59 maranak aymar aru ch’amañchasina
Publicado el 19/03/2014

Phisqha tunka llätunkani maranakaxiw utt’asitapat jichhakamaxa: aymar aru ch’amañchasina, aymar saräwi thurunchasina ukjamaraki markachirinakarus p’arxtayasa.

Condecoración a RSG

San Gabriel radiox phisqha tunka llätunkani maranakaw aymar arusa sapürunjam wayratuqi juk’ampi ch’amañchaski may maya chiqawjanakar purt’asina. Jichhax yamakis internettuqiw uraqpachan ist’atäxi.

Urup amtaskipanx walja jilat kullakanakaw San Gabriel radio-tuqir purt’aniwyapxi ukjamat q’ayacht’añataki ukakikparaki ch’amañcht’añatakisa, radiox wali qamasampi nayraqatar sarantaskakiñapataki. Ukampis instituciones uksat yaqhip irpirinakax purt’aniwyapxarakiwa.


Jayllintir tamanaka ukjamaraki markachirinaka

Jayllintir tamanakas purt’aniwyapxarakiwa: Jach’a Mallku, Ancestro, Taquipayas, Kollamarka, Miguel Orías yaqhanakampi; jupanakax taqi chuymaw phusantt’awayapxi, jayllintt’awayapxarakisa, markachirinakarus chuyms qhanartt’ayasina. Ukataw sapa mara tunka phisqhani uru achuqa phaxsinx radion utt’asitapat amtt’asita. Ukampis walja mara irnaqirinakarux mä condecoración luqtt’awyapxi.


Chapar aru arst'aski

Condecoración katuqiri

Condecoración katuqiri

Jichhakamax wali aski amtanakampiw radiox sarantaski: 2011 maranx pä tunka payani uru taypi sata phaxsinx página web radio San Gabriel ukaw ch’allxatt’asiwayi (www.radiosangabriel.org.bo) ukjamat aymar arusax uraqpachan ist’ataxañapataki; 2013 maransti FM San Gabriel 98.2 ukarakiw ch’allxatt’asiwayi.

San Gabriel radiox jichhas, jutïrinakans aymar aru, aymar saräwi ch’amañchaskakiniwa ukjamat wawanakaru, wayna tawaqunakaru p’arxtayañataki jupanakax jan markapata, arupata, saräwipat armasipxañapataki.

¡Jallälla San Gabriel radio!

Por: G. Salgado

Derechos Reservados © Radio San Gabriel 2011 - 2017
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia