EDUCACIÓN - YATICHIWI YATIQUWITUQITA
Tiwulampin wank’umpin sarnaqäwipa
Publicado el 17/01/2012

Aka siwsäwix wank’umpit tiwulampitaw arxayistu, mä kutix mä jik’a wank’uw  wasar uraqin kisus acht’asit sarnaqaskäna, ukjamaruw mä wali manq’at  awtjat  tiwulax jisk’a wank’ur kisus acht’asit uñjatayna. Tiwulasti wali manq’at awtjat jikxatasisax wank’uruw kisum churxit sasin arxayatayna, wank’usti janikiw jayskataynati kunati kisux jisk’akïnwa janiw jupatakjamäkanti.

Tiwulasti inamayaw achikt’asiskäna wank’ux jani munkänti, ukat wank’uruw manq’antañ amtatayna, wank’usti walrak achikt’asirakitayna,  nayaw mä jach’a kis uñjta uk uñacht’ayäm ukampiw sist’asït sasinaw arxayatayna. Tiwulasti, ukjam satax kusisitaynawa, ukat jank’ak sarañäni nayaw apsüx sasaw sarakitayna.

Wank’ump tiwulampix thakhinjamaw wali jay jaltas jaltas sarapxatayna, niy jak’achasisax quta manqhan wank’ux wali jach’a kis uñacht’ayatayna, ukat jank’ak purisax mäkirakiw apsunï satayna, paniniw chik chikat jajt’asiñäni, sist’asiñkam manq’asiñani, sasinaw tiwulax arxayatayna.

Mayak ipi tiwulax kis apsunxä sasin qutar thuqhuntatayna. Qhana arunxa, janiw kuna kisus utjkänti, phaxsikiw qhanaskäna, ukjamataw tiwulax jiwañar puriwayi. Chiqansa, tiwulax jisk’a wank’ut sallqxataw uñjasiwayi.

¡Jakäwinxa, janiw jach’a jach’ tukuñax askïkiti, ukjamaraki masisarus janirakiw jisk’achañax wakiskiti!

Qilqt’aniri: Filomena Alanoca Fernández

Ayllu: Nazacara

Suyu: Pacajes-Departamento La Paz

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia