EDUCACIÓN - YATICHIWI YATIQUWITUQITA
Waynamp tawaqumpin munasïwipa ‘Amor juvenil’
Publicado el 04/01/2012

Aka siwsäwix pani munasir wayna tawaqutaw arxayistu: Ismael ukjamaraki Dorotea jupanakax uwij awatirïpxanwa. Ismael waynasti Dorotea tawaqutakiw sapürus lup’iskarakïna, jumpampïñpun kunjamats chikañ munarakïna.

Mä uruxa chiqapuniw wali llamp’u arunakamp arxayxatayna, tawaqusti jupar ukjamarakiw munarakïna. Walja urunakaw mäkipawayxarakïna, paninix sum uñt’asxapxarakïna ukampis jichüxapxarakïnwa.

Mä jayp’usti Ismael waynax tawaqur utapar irpasxapunitaynawa, ukat awk taykanakapasti sinti sinti qhurupunipxänwa, janiw yatiñs munapkänti, yamakis tawaqurux janipuniw uñjañs munapkänti. Ukjamïpansti, tawaqun awk taykapäk sarxapxatayna, jupanakasti wali quri chuyman jaqinakapxänwa, waynarux walpin munasipxäna, janipuniw tuqipkänti.

Ukat jaypachatsti, yungas junt’u uraqir qamasir sarxapxatayna, khayansti mayni jilïr jilatampiw uñt’asipxatayna, jupasti wawanakaparjampuniw munasirakïna.

Mä qhawqha urunakatsti, waynax utaparuw punchuplayku kutt’äna, tawaqur sapak jaytjaniwyasa. Utapar wali arum purisasti, jank’akirakiw munatpunchuplayku mantañ yant’atayna; ukat aktjamataw awkipax ikïwit sartthapisax mä jach’a hacha ayxarusisin lunthatachiy sasin p’iqit jisktasin pachpar jiwt’ayatayna.

Qhipharmanthisti, sum uñxatapxatayna ukjax janiw kuna lunthatakänsa jan ukasti yuqapakïnwa, uk uñjasax wälpun jachapxatayna.

Ukañkam tawaqux ina ukjamakiw arumay uru llakisirakïna, ukat akatjamataw um waytaskasin Ismaelux uñstatayna, ukjam uñjasasti jank’akirakiw achachilar yatiyir saratayna, achachilax janiw kuns uñjkänti, jaypachatsti mä jach’a ch’aska thayakiw ¡punchituy punchitu! Sasin arnaqasïna. Achachilax uk ist’asax waynax jiwxpachawa, ukat ajayupax arknaqtamxa, jank’ak misayañamaw tawaqu sasin iwxt’atayna.

¡Jakäwinxa, janiw sinti qhurüñax askikiti, chuymacht’asiñaw wakisi!

¡Wayna tawaqunakas janirak lunthatanakjam chika arumanak sarnaqapxañaniti, mä ch’ipxtankiw jan walir puriñaxa…!

Qilqt’aniri: Juan Quispe Hilari

Ayllu: Ambaná

Suyu: Camacho – La Paz

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia