EDUCACIÓN - YATICHIWI YATIQUWITUQITA
Qaqäka Wayna Potosí qullun säwipa
Publicado el 20/12/2011

Nayrapachaxa, Wayna Potosí jach’a khunu qullux waynar tukusaw sarnaqirïtayna, ukatxa mä qamir jiwa uñanaqt’an tawaqitataw arumay uru jan ikt’as lup’ïna, uka tawaqusti Chuqil qamir Bernitänwa, jupax taqikunanïnwa, uywanakapas tama tama, qurini, qullqini, ukjama. Ukampis sap sapa imill wawarakïnwa, awkinakapats wali munatapuni.

Mä urux Waynax tawaqump sum aruskipt’asaxa, jayp’utuqir irpasxapunitaynawa, paniniw utapar saraxapxatayna, nayampiw wali kusisita jakasiñäni sasin quri arunakamp arxayt’atayna; tawaqu jan kamachirjäsax iyaw sakirakitaynawa.

Jilanakapa uk yatisaxa, wälpin phiñasipxatayna: ¡kamisaraki kullakasar irpasxanisti, ukax janipuniw akch’as walïkiti, thaqhir sarañasawa! sasin qhuru arump sapxatayna. Kunati jupanakax jilapurapxänwa: Illiman qullu, Mururata, Säxama ukjamaraki Illampu. Jan kun kamcht’irjäsax Mallku kunturiruw achikt’asipxatayna, Mallku Kunturisti jank’akirakiw yatiyanïna.

Wayna Potosí qullusti, ist’asikirakitaynawa ukat Chuqil qamir Bernitaw jan jilanakapar uñstañ munxänti, inamayaw waynax achikt’asiskäna. Sapakiw jilanakapäk sararakïna, jilanakapax janiw jupa sapar uñjañ munapkarakïnti, kullaxampiw jutañamänx sapxarakïnwa.

Ukjamatjamaw phiñasisin mayak ch’axwañ qalltapxatayna, Wayna Potosí qullusti janirakiw amukikänti, kutkatasirakïnwa. Sinti ch’axwasax akatjamataw Mururata qullump katjasipxatayna, Wayna Potosí qullux q’urawampiw p’iqit churt’as p’iqip jalarayasin q’alpin jakapachjatayna; jaypachatsti Mururatax jiwawayxataynawa.

Ukürut jichhürkamaw Mururat qullux t’axlak uñjasxi, p’iqipax Pan de Azúcar niy Viacha jak’a uñkatasin jikxatasi, lluqupasti Illimani qullu uñkatasinraki.

¡Sinti phiñasiñax janiw walikiti, taqikunas amuyumpipuniw luraña!

 Qilqt’anirinaka: Vitaliano

 Tórrez, María de Tórrez, Edwin,

Santiago ukjamaraki Viviana

Ayllu: Corapata

Suyu: Los Andes

Askichiri: Gladys Salgado

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia