EDUCACIÓN - YATICHIWI YATIQUWITUQITA
Sirinamp mä machatampi
Publicado el 15/12/2011

Aka siwsäwix Gervasio tatat ukjamaraki Inuka mamat arxayistu, jupanakax chacha warmipxänwa, ukjamarus wali qulqin jaqit uñt’atäpxarakïnwa. Mä uruxa, phuñchhäwir sarañatakiw wakichasisipkäna, Inukax wawanakamp qhiparxakïnwa, chachakiw sararakïna; purisasti walipuniw arkump mantatayna, ukan machxatt’asxatayn kunawa.

Jayp’utuqirusti, jaqichasirinakäkarakiw machantatpach sararakitayna, purisasti ukjamarakikiw walja qulqimp machaq jaqinakarux t’irkatatayna; arumarusti walrak thuqt’asxapxatayna, machxat’xapxatayna. Ukat arumpachaw liwi liw utapar sarawayxatayna; thakhinjamax wali jach’atat qhirqhiyt’asisaw sararakïna. Akatjamataw mä warmix jupar arnaqanitayna, uk ist’asasti mulljasitaynawa, ñik’utanakapas aliqapuniw sayaratayna, jupax khitïtas sasin kutkatasirakitaynawa. Uka warmisti wali jiwa uñanaqt’anitaynawa, taqins munkayapuni.

Warmisti machatar llamp’u arunakampiw arxayatayna, machat jaqisti janiw kunäkipans amuyaskarakïnti. Ukat utaparuw ikir irpxarakïna, tawaqun utapax llijkiripunïnwa, taqikun phuqt’atänwa. Suti arumjarusti, panpachanix ikt’awayxapxarakïnwa.

Qhirphärmanthi willjta pachaxa, wali thayjataw akatjamat chachax sartthapirakïna, taqituq uñatatasisinsti janiw kuna warmis utjkäniti ni utas utjkänti, mä pampanak qalar qhumantat warmiw sas qhantatitayna. Mulljasisinsti, jank’akipuniw jan uñtasis utapar sarawayxatayna. Mä qhawqha urunakatxa, wäl usuntawayxatayna, yatiripuniw jiwañat qhispiyatayna.

Gervasio tatax sinti machirïtapataw ukjamar purt’asiwayi, jan warmipar arunakap ist’asisaw ukjamarus puriwayi. Jan ist’asirïñax janiw walikiti, jan walinakaruw puriyistaspa.

 Qilqt’anirinaka: Manuel Mamani M. ukjamaraki Jhony E. Mamani M

Ayllu: Ch’alla Pampa

Suyu: Manco Kapac

Askichiri: Gladys Salgado

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia