EDUCACIÓN - YATICHIWI YATIQUWITUQITA
Mä katurin tinkrirkisptatapa
Publicado el 14/12/2011

Mä kutix pani chachaw ch’umituqin uywanak katusin jakasipxäna, sapürunjamaw ch’umi manqhan jakasir laq’unak katupxirïna.

Mä urusti, panpachaniw laq’unak katur sarapxäna, uküruxa, janiw mays katupkarakïnti, yamakis mayni masipax walipuniw manq’ats awtjayasxarakïna. Ukat sumpach amyt’asisasti, sapa mayniw maysanjam, maysanjam uywanak thaqhir sarapxatayna.

Mayni sallqa amtan masipasti, masipar jiwayañatakiw uñch’ukiskäna, ukat mäkirakiw uraqir sunt’susin tinkrirkipstatayna masipar manq’antañataki. Ukjam sarkasin, mayni masipax mayak akatjam mä jach’a uywar sarnaqir uñjatayna, jupasti jank’akirakiw illapt’añap apsusin illapt’atayna, wich’inkhatpun churt’atayna.

Uka jaqisti, wäl wararitayna, janiy ukjam luristati sasina. Qhana arunxa, mayni masipax janiw masipätapx amuykänti, tinkriruw jiwayt saskänwa.

Jan walir purir waynasti, ukjakiw chuym wäl liq’isïna, jacharakïna ukjama, nayaw juchanït sasinaw masiparus sarakïna.

Jakäwinxa, janiw jaqi masisar sawkasiñax walïkiti.

 Qilqt’aniri: Juan Vico Mamani

Ayllu: Mayaya

Suyu: Larecaja

Askicht’iri: Gladys Salgado

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia