EDUCACIÓN - YATICHIWI YATIQUWITUQITA
Kunjamas challwa wajax lurt’aña
Publicado el 13/12/2012

¿Cómo cocinar pescado a la piedra?

P’ap’ix awtipachanaw wajt’ata, kunati ukapachax uraqix wañawa, janiw ch’aranakiti, jank’akikiw qhatt’araki. Jilpachax quta thiyan qamasirinakaw challwa waja lurt’asipxi, jupanakax saräwinakapa, luräwinakaps janiw armt’asipkiti.

Jichhax p’ap’i lurañ yatxatapxañäni, kunanakas wakisi, qhawqha pachas qhathiyaña, kunampis wiyaña, kunampis imxataña juk’ampinakata:

Kunanakas wakisi ‘materiales necesarios’

  •  Challwa
  •  Qala
  •  Lawanaka
  •  Jayu
  •  Kanasta
  • Cartonanaka
  • Thantha ikiñanaka
  • Uma
  • Wichhu
  • Waña totora

Kunjamas wakicht’aña ‘preparado del pescado’

Wali suma p’ap’i wakt’ayañatakix akjamataw qallantaña:

  • Challwanakaw qutat katsuniña (pesca de peces).
  • Katsunisinsti, mäkirakiw sum jariraña (lavado).
  • Jarirasax lupiruw saqaña patar mä qhaqha pachanak wañacht’aña (secado).

Challwanakaw wañacht'ataski

Lupir challwa wañacht’atax janiw qhulsuyañkam wañsuyañakiti, mak’iratakiñapawa, ukjamarus amparampiw k’achäñat uksat aksat unxtayaña, jiphillañanakpas janiw ch’itsuñakiti, jisk’aruw tukxiri sapxiwa.

Kunjamas hornux lurt’aña ‘construcción del horno’

Akjamaw lurt’aña:

  • Qalaw aptaniña, janiw kawkïr qalañapakiti, jan t’aqiri, jan phalliri qalanakañapawa, yaqhipanakax urqu qalaw aski sapxiwa; ukampis qalanakax mä juk’a t’alxpachanakañapawa (piedras planas).
  • Pirqt’añatakix uraqiw mä juk’a allst’aña (excavar un pequeño hueco).
  • Ukataw qalampiw pirqantañ tukuyañkama (construcción del horno).
  • Horno patxarux mä jisk’a qaqaw jilt’ayaña, uka taypi jiq’ix mistsuñapataki (dejar un pequeño hueco como chimenea).

Ukjamataw ch’ullqhi tantiy amparamp irtkañ qalanakat jisk’a muruq’u hornux wali jiwaki jank'ak pirqt’aña, taqins muspharkaña.

Kunjamas hornux phichhaña ‘calentado del horno’

  • Horno manqharux mä qhawqha t’una t’ulanakaw apantaña (dentro del horno colocar leñas desmenuzadas).
  • Ukarux jank’akirakiw ninax nakkatayaña (encendido del fuego).
  • Nakkatayasinsti walipuniw t’ulamp wiykataña, qalanak wali suma parintayañkama (calentado de las piedras).

kullakaw horno phichkataski

Ch’ulqhi qalat pirqt’at jurnux wali sumaw parintayaña, janiti suma parintatakaspa ukjax janiw challwanakax qhatkaspati, pachparuw ch’uqirawayxaspa.

Kunjamas challwax hornur apantaña ‘cómo colocar los pescados al horno’

  • Niyakiti hornux wali suma parintaxi ukjax thuru thantha wariranakamp katt’asinaw qhathir qalanakax jurnu thiyar q’ala apaqaña (desatado del horno).
  •  K’illim thiyanakatx parit qalanakampiw pirqt’aña (cercado con piedras calientes).

Hornux q'ala jartataxiwa

  • Patxarux ch’illiwampi jan ukax wichhumpiw apxataña (cubrir con paja).
  • Wichhupatxarux periodikumpi jan ukax jich’us kartunakampiw mäki janxataña (cubrir con periódico o cartón delgado).
  • Uka patxarux jank’akirakiw challwanakax suk'xataña (colocado de los pescados).

Jayumpiw warakipasipki

  • Patxatx jich’us kartunampiw janxataña, uka patxarux parit qalanakampirakiw apxatañaraki (cubrir con cartones o periódicos)
  • Challwa patxarusti mäkirakiw ñut’u jayump warxatas challwax kittaña (mezclado con sal yodada).
  • Ukjam lurasaw taqpach challwax tukuyañkam suk'xataña, yamakis thiyanakarux apilla, ch’uqi juk’ampinakaw apxatatarakispa (si gusta puede incluir papa, oca, etc. ).

Kartunampiw tapxatasipki

  • Thiyanakatx waña tuturanakampi, jan ukax yaqha quqa laphinakampis jan qalanak uñstkiri sum imxataña (cubrir con las plantas secas).

Tuturampiw imxatasipki

  • Patxarux thuru mantiyumpi, thantha ikiñanakampi, yutimpis sum janjatawayxaña (cubierto total).
  • Niya mä hora, jan ukax mä hora y media ukja pachanaw qhathiñapa, ukatakisti, qalanakaw sum parintatañapa.

Suma imxatataxiwa

Kunjamas p’ap’ix apsuña ‘cómo sacar p’ap’i’

  • K’achäñataw ikiña, tuturanakas apaqxaña (destapar con cuidado).
  • Challwanakax mä kanastaruw uskuntaña (almacenado).
  • Apillanaka, ch’uqinakas kikiparaki.
  • Jan jich’us kartunanaka purapat lip’thapiñapatakix jayun umampiw mä juk’a uksat aksat ch’axch’akipt’aña (esparcir con agua salada).
  • Ukataw manq’t’xapsnasa, jan ukax alxt’apxaraksnasa.

P'ap'ix manq't'añpachawa

Ukjamakiw challwax wajt'aña, janiw ch’amakiti. Qhana arunxa, p’ap’ix parit qalanakampiw qhathiyaña ¡kunja askisa! saräwinakasat taqinis juk’ampi yatxatasipkakiñäni…

Por: Gladys Salgado Salgado


Yatxatatanakat jiskxatt'ata
Kullaka Loza A. phisqha tunka marani, ayllu Surixapa suyu Omasuyos

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia