EDUCACIÓN - YATICHIWI YATIQUWITUQITA
Qullan aymar markan aski yatïwinakapa
Publicado el 15/08/2012

Nayrapachanakax aymara, qhichwa markachirinakax aru taypikiw kuns phuqhayapxiritayna, janiw kuna qillqatanaks apnaqapxirikataynati. Aruxa, mä kamachikaspas ukjamataynawa; janiw sallqantasiñanakas utjkataynati, janirakiw ina pampas arsupxirikataynati, jan ukasti sum amuyt’asisa. Jichhapachanakas ukjamakiskiwa, janiw armatakiti. Uka taypinkiw iwxanaka, säwinaka, lup’ïwinaka juk’ampinaka.

Jichhax ukanak mä qhawqha amtthapt’apxañäni, yatxatapxarakiñanisa, jiwasanakan amuyt’apxañasataki, p’arxtapxañasatakisa.

Iwxanaka ‘recomendaciones’

Kunapachati mayni wayna tawaqus jaqichasxiritayna ukjaxa, jilïr jila kullakanakax akjamat aski arunakamp iwxt’apxiritayna:

“Jichhürut uksarux jaqïxapxtawa, jiwaw jumanakarux jaljtayapxätam”; kuna irnaqäwinakans purapataw yanapt’asipxäta, janipuniw jayräñati, sasina.

Säwinaka ‘refranes’

  • Qullqis quris thayamp urpump sasiwa.
  • Awk taykarux janiw jachayañakiti, wiñay jan kuns jikxatiriñaw sapxiwa.
  • Aka jakäwin taqikunas aynikiwa.
  • Q’apha amparan jaqinakatakix taqikunas walt’akiwa…

Lup’ïwinaka ‘pensamientos’

  • “Aymaranakax taqituqin ch’iqintatapxtanwa, janiw chhaqkanisa, ni chhaqhayapkistanisa”.
  • "Kuna irnaqäwins mä wawakiw irnaqt'aña, ukjamat mäk tukt'ayañataki".

Uka iwxanaka, säwinaka, lup’ïwinak arsuñas phuqhayatapuniritaynawa, ukampirus ukax janiw ina pampak arsupxirikataynati, jan ukasti jiwasan aski sartañasataki, wali suma qamasipxañasataki, kunati jaqit jaqirux yäqasiñaw utjatayna. Ukjamarus janiw jayrasiñas, lunthatasiñas jichhapachanakjam utjirikataynati.

¡Wakisiw uka aski yatïwinak amtthapiña, yatxatañasa. Jichhapachanakan yaqhip chiqawjanakan armatjamakixiwa…!

Panka ullart’ata

Gómez, Donato (2010). Literatura aymara. Impreso en Bolivia.

Jamuqa

http://4.bp.blogspot.com/GzWEIRyT7QI/UBDlMq2z5CI/AAAAAAAAATY/9SxA3zJYfvU/s1600/REFRANES+Y+SU+SIGNIFICADO+PBDFNEWS+7+25+2012+PERGAMINOS+PBDFNEWS+25+listo+grande.png

Por: G.S.

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia