EDUCACIĂ“N - YATICHIWI YATIQUWITUQITA
Munasińax jiwa qurpawa
Publicado el 07/12/2011

Aka siwsäwinxa, pani munasirinakataw qhanañchapxistu: Hilakumpit Antukampita. Paninix walipuniw munasipxänxa, jiwaw jaljtayistani sasinaw aruskipt’apxäna, ukampis janiraw chikthapitapkänti, jichhaw chikthapiñatak sum aruskipt’asipkäna.

Ukat akatjamataw Antuka tawaqux jan wali usump usuntawayi, janipuniw jank’as k’umarchasxänti, ukjam jikxatasisaxa, arumay uruw Hilaku muniripat wäl llakisĂŻna. Hilakusti jan muniripamp jikisxasax ukjamarakikiw llakisĂŻna, jikisiskaw sasakiw sakirakĂŻna.

Mä qhawqha urunakatsti, tawaqux jan mayampitakiw wiñay markar jaltawayxäna, qhana arunxa, jiwawayxänwa, awk taykapax wal jachapxarakĂŻna kunati sap sapa phuchhänwa. Jan kuns kamacht’añjamäxipanxa, wilamasinakapamp chikt’ataw wali llakt’ata, jacht’asisa chhaqt’ayanxapxarakĂŻna.

Hilaku waynax uk yatisinxa, wäl mulljasĂŻna, jan aruniw qhipartatäna, sintipuniw arumay uru muniripat jachäna, jupat lup’käwix ina luqhiratäkaspas ukjamakirakiw sapĂĽrus sarnaqxanxa.

Mä arumaxa, akatjamataw thakhinjam sarkasin Antukax uñstatayna, waynasti jupar uñjasax amukiw sayjxäna; ukat juk’at juk’ataw sum jikthaptasin purapat aruskipt’as, uñkatt’asis, k’uchiki sarawayxapxäna. Antukax akjam sasaw arxayarakitayna: ¡Hilaku, sarxañäni, nayax machaq utjäwinixtwa, taqikunaw utjitu janiw kunats t’aqhiskañäniti, ukar qamasir sarxañäni!

Waynax uka arunak ist’asax mulljasĂŻnwa, sumpach lup’isax mäkirakiw jaysatayna; paniniw thakhinjam aruskipt’as, aruskipt’as sarxapxatayna. Niy purisasti, tawaqux sataynawa: ¡akaw utaxäxa, wali thayarakisä, uta manqhar mantxañäni! Waynasti uka arunak ist’asax mulljasitayanawa, janiw kuns kamacht’irjamätaynati, ukat mayak akatjamat pantyum pirqar liwitattatayna, ukjansti ikitakiw qhantatxatayna.

Qhirpharmänthix wali thayan thayjataw ikit sartthapitayna, uñatatasisasti, janiw kuna utas utjkataynati pantyum thiyanak ikiskatayana, janiw kuna Antukas utjkarakĂŻnti nichupakiw ukjan uñjasirakĂŻna. Mulljasisinsti, jank’akiw utapar jaltawayxatayna.

Mä qhawqha urunakatsti, sintipuniw usuntawayxatayna, luqhiruw tukxarakitayna. Utapansti, awk taykapax chint’atakiw uñjxapxäna. Mä alwasti, jiwatakiw uñstxarakĂŻna, awk taykapax walpun wawatjam jachapxarakĂŻna, ukat wilamasinakapamp chikañcht’asisax imt’anxapxarakĂŻnwa, ukampirus munirip jak’aruw chhaqt’ayanxapxänxa.

Ukjamaw uka pani munasirinakan sarnaqawipax tukusiwayi, wali llakkaña wali lup’iñjamarakiwa, awk taykanakapar axsarasaw ukjamar purt’asiwayapxi.


Siwsäwi qilqt’aniri: I.L.C.S

Suyu: Manco Kapac

Askichiri: Gladys Salgado

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia