SALUD - K'UMAR JAKAWITUQITA
QAÑAWAX jakäwisatakix wali wakiskiripuniwa
Publicado el 12/06/2012

LA CAÑAHUA ES FUNDAMENTAL PARA NUESTRA SALUD Y ALIMENTACIÓN

Yatipxañasataki ‘para informarnos’

Nayrapachanakax achachila awichanakasax wali ch’amañchir manq’anak manq’asipxiritayna, ukat patakat jila maranakaw jakasipxiritayna, janiw usuntañ yatipxirikataynati, wali ch’ulqhi, k’umara, ch’ikhi ukjamapxiritayanwa.

Uñstäwipa ‘origen’

Qawañax nayrapachanakatpachaw Los Andes, Qullasuyu markan utjatayna, jilpachax (Bolivia - Perú) uksanakana. Aymara qhichwa markachirinakaw achuyapxiritayna, manq’asipxarakiritaynasa.


Kunapachati españoles jaqinakax Awyayala uraqir purintanipkatayna, ukjataw jiwasan chiqpacha ch’amañchir manq’anakasax jan añcha achuyataxataynati, janis askïkaspa ukjamakiw uñjatäxatayna.

Janïr españoles q’ara jaqinak purinkipanxa: jupha, qañawa, ch’uqi, tunqu uka juyranakax aymara, qhichwa jila kullakanakatakix wali wakiskiri manq’anakataynawa. Q’ara jaqinakax quri, qullqi ukanakak wal munapayxapxatayna; markachirinakarusti alaxpach awkin arunakap yatichsuña, saräwinakap armasipxañapataki. Jupanakatakix pachamamat amtasiñas, willka tatat amtasiñas juchänwa, janiw walikänti.

Españoles q’ara jaqinakax wali suma achuyañ uraqinak katuntasipxatayna: suni, junt’u, qhirwa uraqinaka; kawkjanti waka, uwija jupanakan apanit uywanakapatak suma pastunakax utjkäna uka chiqawjanaka.

Nombre científico

Yatxatatanakax Chenopodium pallidicaule sutiñchapxatayna, ukjamarus familia Amaranthaceae, subfamilia Chenopodioideae, género chenopodium uksankirirakiwa. Aymara, qhichwanakan wali yäqata juyrätaynawa.


Sutipa ‘etimología del nombre’

Qañawax aymara arut sutiniwa, yaqhipanakax qhichwa arutaw sapxarakiwa, wakisispaw amuyt’apxañasaraki. Nayrapachanakax aymaranakana, qhichwanakan wali manq’ata, wali yapuchatätaynawa.

Qañawaxa, niya juphar uñtatawa: laphinakapakiw jisk’pachanaka, lawanakapasti jich’uspachanaka tantiypachanakakiraki, janiw juphä ukch’anakakiti. Ukat 30cm, 50cm uch’a alayarux jilaraki. Saminakapas may mayarakiwa: wila, qhana wila, qhana q’illu juk’ampinaka.

Jañchisar ch’amañchiri ‘valor nutritivo’

Qañawaxa, jañchisatakix wali wakiskiripuniwa: k’umara, ch’ikhi jakasipxañasataki. Janiw jasaki lik’intaykistaspati; ukampirus walja proteínas, aminoácidos, minerales ukanakanirakiwa. Yamakis uraqpachan qañawax juphatsipansa, soyatsipans juk’ampi aski ch’amañchirinakaniwa, sasin yatxatatanakax yatiyapxaraki.


Qañawa achuyir markanaka ‘países productores de la cañahua’

Uraqpachanxa, Bolivia markanaw jilpach qañawax yapuchata; ukjarusti Perú markarakiw achuyaraki. Yaqhip markanakanx janikiw yapuchapkiti, kunati 3.500 ukakikparaki 4.500 m.s.n.m. ukja suni thaya alay uraqinakanaw achuraki.

Bolivia markan achuyir chiqawjanaka ‘regiones productores de la cañahua en Bolivia’

Bolivia markasanxa, qañawax akïr departamentos uksanakanaw achuyata: La Paz (provincia Pacajes, Aroma, Gualberto Villarroel, Ingavi, Los Andes, Omasuyos, Manco Kapak, Camacho, Murillo); Cochabamba (provincia Tapacarí, parte de Ayopaya y otros); Oruro, Potosí…


May maya qañawa ‘variedades de la cañahua’

Qañawax may mayaw utjaraki: Janq’pach qañawa, churpach qañawa yaqhanakampi. Ukampis mäwjat mawjaru, markat markaruw yaqha sutimp uñt’ataraki, janiw kikipäkiti, samipats kikiparaki.

Anqa markar qañawa apsüwi ‘exportación de la cañahua’

Bolivia markan aski ch’amañchir juyranakax jilpachax anqa markanakarukiw apsuta: Estados Unidos, Europa, Colombia juk’ampituqinakaru janiw markasan añch manq’atäkiti; yaqhippachanakax janikiw yäqatäxisa…

Qañawax qullarakiwa ‘medicina natural’

Qañawax usunak qullt’asiñatakix wali askiwa: anemia, mal de altura, jump’i usu apaqañataki (fiebre), kursiy ususs jank’akiw sayt’ayaraki (diarrea). Ukampirus jiwasanakati sapüru qañawa, jupha yaqha ch’amañchir manq’anak manq’t’asipxsna, ukjaxa janiw usuntañarus puripksnati, wali k’umara, ch’ikhi jakasipxsnaxa.

Jichhürunakanxa, ch’amañchir manq’anakax janiw añch manq’atäxiti, jasa manq’anakakiw manq’atäxaraki (comida chatarra): juyranakatsipnsa, muxsa achunakatsipansa. Jiwasanakan jan suma manq’asitasataw kunaymäni usunakas urut urutjam aynacht’ayasipkistu, jiwañarus puriyasipkistu…

¡Taqini amuyt’asxapxañäni, p’arxtxapxañäni, taqikunas jiwasatjamakiwa!

Por: Gladys Salgado Salgado

Pankanak ullart’ata

Cáceres, Edgar (1993). Cultivos andinos. Impreso en Bolivia.

Kusack, David (1984). Quinua grano de los Incas. Boletín del Instituto de Estudio Aymaras. (Serie 2, Nº 17). Puno-Perú.

Internet qilqatanak ullart’ata

Alianza para el Consumo Responsable y Solidario: http://soberanialimentaria.org.bo/index.php?option=com_content&view=category&id=15&layout=blog&Itemid=2

http://www.bolivianagribusiness.com/index.php?option=com_content&view=article&id=51:canahua&catid=37:cereales-andinos&Itemid=56

http://experienciasdesarrollo.blogspot.com/2010/01/buscan-que-la-canahua-se-convierta-en.html

http://ccbolgroup.com/amaranto.html

http://plantitas.wordpress.com/2007/09/19/caihua-energizante-y-contra-males-cardiovasculares/

Jamuqanaka

http://soberanialimentaria.org.bo/images/stories/851.jpg

http://www.agriculturesnetwork.org/magazines/latin-america/1-especies-vegetales-subutilizadas/la-canahua-merece-regresar/68939_211_1_2.jpg

http://www.agriculturesnetwork.org/magazines/latin-america/1-especies-vegetales-subutilizadas/la-canahua-merece-regresar/68939_211_1_1.jpg

http://www.losandes.com.pe/recursos/fotos/17541_370x0.jpg

http://soberanialimentaria.org.bo//images/upload_slides/canahua1.jpg

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia