EDUCACIÓN - YATICHIWI YATIQUWITUQITA
Aymar warmin ch’ama tukuwipa ‘El sacrificio de la mujer aymara’
Publicado el 02/04/2012

Aka siw säwix mayni sinti ch’am tukt’ir aymar warmit arxayistu, jupax pä yuqall wawanakanïnwa, chachapasti kuna lurañs ch’amtayakirïnwa, jupapuniw jank’ak kuns lurt’añ yatirakïna.

Jilïr yuqapax waynäxanwa, ukat Jach’a Yatiqañ utaruw yatxatir sarañ munäna, awkipakiw jan kuns yatiñ munkänti; tawkapasti quri arunakamp arxayt’asinaw iyawsayarakïna. Mariano yuqapax Jach’a Yatiqañ utankxänwa, jupasti qullirïñatakiw yatxataskarakïna. Mamapasti yuqap yatxatañapatakixa, ch’uq alxt’asisinakiw kunjamats qulq jikxatarakïna.

Mä urusti, lunthaw ch’uqi alxat qulq q’al lunthatawayxatayna, ukat wäl jacharakitayna, janiw chachaparus yatiykataynati. Ukatsti isi t’axsurit sarxäna, Chikiyagun qamasir mamanakats uñt’atäxarakïnwa, ukjamatakiw mä qhawqha juk’a qulqi wawapar yanapt’añatak jikxatasirakïna. Wawapasti, taqi chuymaw yatxatarakïna.

Maranakas jank’akirakiw mäkipawayxäna, Mariano waynasti niyaw tukuyañampixäna. Día de la madre uka urupuniw jupax Certificado de Egreso paylläwi katuqt’asitayna, ukjakiw awk taykapax yuqapar uñjasax wäl kusisipxatayna, kusisiñats jachaqt’asipxataynawa.

Chiqansa, mamapaw manq’atas jan manq’atas arumay uru wawaplayku sinti ch’am tukt’awayi, kullakasti janiw jayrakänti, wali q’apha warmïnwa; ukjamätapatx taqi jaqin uñt’ataxarakïnwa, ukampis taqiniw jupar munasipxäna.

¡Awkix awkikiwa, taykapuniw waranqaxa!

Qillqt’aniri: Flora Arias Molina

Askicht’iri: G.S.

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia