EDUCACIÓN - YATICHIWI YATIQUWITUQITA
Pachamaman khuyapayasiñapa ‘Bondad de la Pachamama’
Publicado el 29/03/2012

Aka siwsäwix Pachamampit tiwulampitaw arxayistu, kunati nayrapachanakax jamach’inakas, uywanakas arsürin sapxiwa.

Mä urux tiwulamp pachamampiw jikthaptapxatayna, Pachamamax wawanakapatakiw manq’añanak tiwular apayasitayna. Thakhinsti, tiwulax uka apayatanakx mäwjar qunt’asisin q’äl manq’antawayxatayna. Ukat mayak purakapax ch’itkatatayna, ukjakiw wäl chuym liq’isitayna, kunataks jan ist’asta sasina. Mä juk’a pachatsti, purakapax phallxataynawa.

Pachamamax uk yatisin wäl jachatayna, akjamaspat khithanakax sasina. Ukürut uksaruw pachamamax sum amuyt’atayna: suni uraqinakan wawanakajax kunayman juyranak yapuchasxapxani: ch’uqi, apilla, jawasa yaqhanakampi; qhirwa uraqinakansti muxsa achunak yapuchasipxarakini. Ukat jupanakax purapataw chhalaqt’asipxani, sasina.

Aymar saräwin pachamamax uywirisawa, jisaruw manq’ayistu, jarphipanaw jakasipxtana. Jichhapachanakan janikiw askinjam uñjatäxiti, urut urutjamaw jan walt’ayata uñjasxi. Pachas mayjäxiwa, janiw nayrapachanakjamaxiti, kunapachas jalluntxaki, juyphis juypxintxakiwa.

¡Jan ist’asirïñax jan waliruw puriyistu!

Qilqt’aniri: Marco Antonio López

Suyu: Murillo-La Paz

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia