SALUD - K'UMAR JAKAWITUQITA
JUPHAX jakäwisatakix wali wakiskiripuniwa
Publicado el 07/03/2012

LA QUINUA ES FUNDAMENTAL PARA NUESTRA  SALUD Y ALIMENTACIÓN

Yatipxañasataki ‘Para saber’

Nayrapachanakax achachil awichanakasax wali ch’amañchir manq’anak manq’asipxirïtayna, ukataw jupanakax walja maranak jakasipxarakiritayna, janiw usunaks uñt’apkataynati.


Juphan uñstäwipa ‘Origen’

Juphaxa, janïr tatit yurkipanpachaw niya kimsa waranq juk’amp nayra maratpachaw Los Andes suni uraqtuqin utjatayna. Yaqhip yatxatatanakax sapxarakiwa: Juphax Bolivia, Perú, Chile markanakanaw nayraqatpun achuyapxatayna, sasina.

Janïr españoles q’ara jaqinak purinkipanxa: Aymara, Qhichwa jila kullakanakatakix wali wakiskiri manq’apunitaynawa. Kunapachati españoles q’ara jaqinakax Qullasuyu markasar purinipkatayna, ukjataw jupha ukjamaraki yaqha juyranakas jan añch achuyxapxataynati. Españoles jaqinakax quri, qullqi ukak wal munapayxapxatayna; markachirinakarusti alaxpach awkin arunakap yatichaña. Jupanakatakix pachamamat amtasiña, willka tatat amtasiñas juchänwa, janiw walikänti.

Españoles q’ara jaqinakax wali suma achuyañ uraqinak katuntasipxatayna: suni, junt’u uraqinaka; ukjamarus kawkjanti waka, uwija jupanakan apanit uywanakapatak suma pastunakax utjkäna uka chiqawjanaka. Yamakis Actos ceremoniales ukanakan Sacerdotes jaqinakax quritkam lurat vasijanakarux jupha phuqhantat apasin willka tatar waqaychapxiritayna.


Nombre científico

Jupharux Chenopodium quinoa willd sasinaw yatxatat jaqinakax sutiñchawyapxtayna, ukampirus familia Chenopodiaseas uka taypinkiriwa. Aymaranakats, inkanakats “grano de oro” sutimp uñt’atätaynawa, ukjamarus wali yäqatatarakitaynawa.

Jañchisar ch’amañchiri ‘Valor nutritivo’

Juphax jañchisatakix wali wakiskiripuniwa, janiw colesterol ukanikiti, jañchisanx janiw lik’i utjaykiti, jaqirus janirakiw jasaki lik’intaykiti, khistjañas janiw chamäkiti, jasakirakiwa.

Yaqha juyranakatsipans juk’amp ch’amañchirinakaniwa, wakiskir proteínas, aminoácidos ukanakani: Isoleucina, Leucina, Lisina, Metionina, Fenilalamina, Treonina, Triftofano juk’ampinaka.  Yaqha juyranakatsipans walja minerales ukanakanirakiwa: Fósforo, Potasio, Magnesio, Calcio yaqhanakampi.

Jupha achuyir markanaka ‘Países productores de la quinua’

Bolivia markaw uraqpachan nayrïr jupha achuyirixa, ukjarusti Perú, Chile, Argentina, Colombia, Ecuador yaqha markanakampi. Nayrapachanakatpachaw achachila awichanakasax Qullasuyu markasan achuyapxatäna ukjamaraki manq’t’asipxiritaynasa.

Bolivia markan achuyirinaka ‘Regiones productores de la quinua en Bolivia’

Bolivia markanxa, akïr departamentos uksanakanaw jupha achuyapxi: La Paz Oruro, Potosí, Cochabamba. Departamento de La Paz provincianakana: Pacajes, Camacho, Omasuyos, Los Andes, Ingavi, Murillo, Aroma, Gualberto Villarroel. Departamento de Oruro provincianakana: Abaroa (parte), Sebastián Pagador, Poopó, Pantaleón Dalence, Sajama, Saucarí, Cercado, Carangas, Litoral, Atahuallpa, Ladislao Cabrera. Departamento de Potosí provincianakansti: Antonio Quijarro, Daniel Campos, Nor Lípez ukjamaraki Enrique Baldivieso.


May maya juphanaka ‘Variedades de la quinua’

Walja kasta sutinakan juphaw utji: Quinua Real, Jaru jupha, ch’ixi jupha, ajar jupha, janq’u jupha yaqhanakampi. Saminakapatsipansa, ukjamarakikiw mayjt’i; alinakapats kikiparakiwa, janiw pachpakiti.

Anqa markanakar apsüwi ‘Exportación de la quinua’

Markasan juphax janiw añch manq’atakiti, anqa markanakarukiw jilpachax apsutaxi: Estados Unidos, China, Japón, Perú, Europa, Israel, Canadá yaqha markanakampiru. Jupanakaw askinjam ch’amañchasisipki, jiwasanakasti kuns manq’asisktana…

Juphax qullarakiwa ‘Medicina’

Jupha jak’ux ninamp nakharat jañchitaki (quemaduras), jañchi usuchjatatakis (contusiones de la piel) qullarakiwa. Yamakis Cáncer de mama usutakix wali askipuniwa, ch’akha usutakis (osteoporosis) kikiparaki.

Chiqansa, jupha manq’t’asisinxa, janiw usuntapksnati k’umaraw jakasisispksna, ukjamarus walja maranakarakiw ch’ulqhi, ch’ikhi, ch’amani jakapsnaxa. Jichhapacanakan juphax janikiw yäqataxiti, ni manq’ataxarakisa. Ukataw jan uñt’at usunakas urut urutjam uñstxaraki; markachirinakas janiw walja maranak jakxapxtanti, ñakakiw suxtatunkarus jak’achxaraktana.

Qilqt’iri: G. Salgado

Pankanak ullart’ata

Pacheco Z., Arminda. Quinua en Bolivia, primera edición marzo 2004

Ministerio de Asuntos Campesinos y Agropecuario. Sistemas de Producción de quinua en el altiplano, La Paz Bolivia 1988

Estudios Aymaras. Serie 2 Nº 17, Editorial 1984, Puno - Perú

Internet qillqatanak ullart’ata

http://www.prodiversitas.bioetica.org/quinua.htm

http://laquinua.blogspot.com/2007/06/origen-e-historia-de-la-quinua-i.html

http://laquinua.blogspot.com/2007/06/origen-e-historia-de-la-quinua-ii.html

http://es.wikipedia.org/wiki/Chenopodium_quinoa

http://www.rlc.fao.org/es/agricultura/produ/cdrom/contenido/libro03/cap1.htm

http://www.rlc.fao.org/es/agricultura/produ/cdrom/contenido/libro14/cap2.2.htm

http://www.bolivia.com/noticias/autonoticias/DetalleNoticia39077.asp

Jamuqa

http://lh3.ggpht.com/-dePO7vzWcyM/TxXnNzT29YI/AAAAAAAAA3c/0IlAsMDG1TU/Quinua_Roja_Variedad_Phisankalla-Rub%2525C3%2525A9n_Miranda%25255B6%25255D.jpg

http://www.como--limpiar.com/wp-content/uploads/2011/12/quinoa-1.jpg

http://www.losandes.com.pe/recursos/fotos/13959_370x0.jpg

http://www.elclarin.cl/web/images/stories/2011/julio/quinoa.jpg

Derechos Reservados © Radio San Gabriel 2011 - 2018
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia