Thuqt’awinakasaw jach’anchat utjawayi

5526 machaq maranakaw katuqata

Aka markasanx wasuru pä tunka mayani urunaka  mara t’aqa (junio) phaxsit maykipawaykipanx phisqha waranqa phisqha pataka  pä tunka suxtani (5526) machaq mara  aymara Andino Amazónico katuqataw utjawayi. Uka amtawx kunayman chiqanakanaw  katuqañatakix wakt’ayat utjawayi. Wilkan ch’amap katuqawayapxi.

Ayllunakans jach’a markanakans  ukham amtasiwaykipanx walipuniw  nayra achachila awichanakasan  thuqt’awinakapa uñacht’ayata utjawayi. Ukampis uka thuqt’awinak tuqix pachpa amparamp p’itata, sawut’atanakaw uñacht’ayata utjawayi. Ukatx khaysa Municipio Calacoto suyu Pacajes tuqinx ukhamataw jiwasanakan thuqt’awinakasx uñacht’awayapxi, ukampis pachpa tuqin utjiri uywanakan t’arwapat amparamp qapt’ata, p’itatanakampi isi lurt’atanakampiw isthapt’asisa thuqt’asiwayapxi.