Lula da Silva jupax juchanchawipat qhisphiña mayiskakiwa

Ex presidente Brasil markankirirux watañ utaru apaña amtapxi

Luiz Inacio Lula da  Silva jupax khaysa Brasil anqax markanx pä waranqa kimsani marata pä waranqa tunka marakamaw jilir irpirjama uka anqax markana irnaqawayi. Ukakipanx jichhurunakamas wali uñt’atawa sasinaw uka markan qamasirinakax qhananchapxi. Jupasti paqallqu tunka mayani maranakanixiwa.

Jichhax Luiz Inacio Lula da  Silva juparux qullqi juk’uchawinakaya jupata utjawaychispana ukanakata juchanchawayapxi. Ukakipanx khaysa anqax markan kamachinak phuqhayirinakax amtawayapxiw jupax juchanchatañapa. Jichhax kamachinakarjamax Lula da Silva  jupan arxatirinakapax ma hábeas corpus uka Tribunal Superior de Justicia uksankirinakaru luqtawayapxi, ukhamana uka juchanchawipax uñakipatañapataki. Jichhax uka mayiwix kamachi phuqhayirinakatx janiw wakiskirikiti sataw utjawayi; ukataw juparux sawayapxi jichhuru niya phisqha jayp’ukanis Brasil markanx ukakama watañ utaru mantañataki sarañapa.

Ukanaka utjkipanx Luiz Inacio Lula da Silva jupan arxatirinakapax jichhuruw wasitatata   Tribunal Superior de Justicia  Brasil markankirinakaru yaqha qillqatanaka luqtawayapxi,  jan watañ utana llawintatañapataki.