Mä jach’a qhathuw phuqhasini

Provincia Pacajes Ayllu Originario Laura Lloko Lloko ukanx yapuchawimpi ukhamaraki uywachawimpiw irnaqapxi. Uka uraqix suni uraqiwa.  Ukampis jilpachax  qarwa ayllpachu, waka, iwija juk’ampinakaw  uywachata. Ukxarux  ch’uqi,  apilla, ulluku,  jupha, qañawa juk’ampinak yapuchapxaraki.

Ukampis sapa maranjamaw   tunka phisqhani urunakakipan llumpaqa (agosto) phaxsinx  Asunta mamamitat amt’asisinx mä qhathu wakt’ayapxi, ukanx uywachawi ukhamaraki yapuchawit  uñacht’ayapxi. Ukampis jichha marax ukhamarakikiw phuqhayatani. Ukax qharuru tunka phisqhani urukipan aka phaxsinaw phuqhasini.  Ukansti uywanaka,  achunaka,  p’itatanaka,  sawutanaka juk’ampinakaw uñacht’ayasin alxatani sasinaw irpirinakapax qhananchapxi.