Puerto Rico markanaw Congreso Americano Misionero phuqhasini

Qhiphariri tunka urukipana  willka kuti (julio) phaxsit qalltasin tunka pusini urunakamaw  aka phaxsin  phisqhiri Congreso Americano Misionero sutiñchata mathapiwix phuqhasiwayi. Uka jach’a tantachawix khaysa Santa Cruz junt’u uraqin phut’asiwayi.  Ukanx kimsa waranqa jila  markachirinakaw chikañchasiwayapxi. Pä tunka pusini markanakatwa ukankawayapxi. Ukatsti uka jach’a mathapiwi tukt’ayañ urux ukan chikañchasirinakax Santa Cruz markanx  utat uta  sarawayapxi, ukasti alaxpacha awkisana  arupa qhananchañataki.

Uka jach’a tantachawinx akniri amtawinakaw ch’umstawayi: alaxpacha awkisan arupa wali ch’amamp phawaña,  América uraqit anqax markanakar alax pacha awkisan arupa  qhananchaña,  ukatsti amtawayapxarakiw taqi markachirinakax yäqatañapa.

Akat phisqha maranakatx  suxtiri jach’a mathapiwi Congreso Americano Misionero ukax  pä waranqa  pä tunka kimsani (2023) marana khaysa  Puerto Rico markan phuqhasini. Uksa markankirinakax akhamat arsuwayapxi: “jutiri mathapiwinx taqiniruw suyapxama ukhaman aka aruskipawinakax khaysa tuqin ch’amampi nayrar sartayatañapataki”.