Juicio Civil ukax anqax markan ex presidente Goni juparu arkayata

Gonzalo Sánchez de Lozada jupar juchanchawi arkayawix tukxatayaniwa
Wednesday, March 28, 2018 - 08:22

Amthapisina, pä waranqa kimsani maranx aka markasanx ch’axwawinakaw utjawayi, ukasti gas arxatasina. Uka ch’axwawitx qhipharawayapxiw walja usuchjatanaka ukhamaraki jiwatanaka, jupanakana wila masinakapax mayiwayapxiw justicia utjañapa. Ukampis uka marat jichhakamax tunka phisqhani maranakaw maykipawayxi.

Uka illapt’awinakatx ex presidente Gonzalo Sánchez de Lozada ukhamaraki ex ministro Carlos Sánchez Berzain jupanakaruw juchanchawi arkayaña ch’amanchawayapxi, ukhamana mä juicio civil satakis ukax utjañapataki ukatx jupanakax qullqi tuqi usuchjatanakaru, ijmanakaru, wajchanakaru k'ut'ayapxañapataki.

Ukataw uka juchanchawix khaysa Estados Unidos Florida markanx uka pä markachirinakaru arkayata utjawayi. Jichhax uka tuqitx  Asociación de Familiares de los Caídos por la Defensa del Gas ukakipkaraki Comité Impulsor del Juicio tuqinkirinakax sawayapxiwa aka juchanchawix niyaw tukuyani, kunatix ch’ullqhiñchawinakax tukutawa ukampis suyataw justicia utjañapa.