INFORMACIÓN REFERENCIAL
Sección SAAD
Temática Historia
Idioma Aymara
Ver en idioma Castellano

IRNAQÄW PACHANAKA
Phaxsürut - Urürkama
Alwatuqi
08:30 pachat 12:00 pachakama
Jayp'utuqi
13:00 pachat 17:30 pachakama
Qilqantäwinaka
SAAD utt'asïwipa
JUK'AMP YATIÑATAKI
Correo-e: adultos@radiosangabriel.org.bo
Teléfono: (591) - 2832544

SAAD - Sistema de Autoeducación de Adultos a Distancia

Janïr utt'askasa

Kunapachati San Gabriel Radiox utt'asxatayna ukjaxa, ullaña qilqañaw markachirinakar yatichatätayna, ukampis juk'a laphin pankanak yatichirinakamp chikt'at yatichañatak luratätayna. Ukat uka pankanakasti, inakiw lakiratarakïtayna.

Kunapachati San Gabriel Radiompi, Ministerio de Educación ukjamaraki ERBOL uksankirinakamp mä qilqata taypi mä amtäwir puriwayapkatayna, jila kullakanakar yaticht'aña, kunjamati Bolivia marka p'iqiñchirin amtäwinakapax utjkäna ukjamarjama. Ministerio de Educación y Cultura uksankirinakax ítems satäki ukanak Escuelas Radiofónicas de Bolivia - ERBOL uksankirinakar luqtawayapxatayna; tunka phisqhan ítems San Gabriel Radiotak utjayasa, ullaña qilqaña nayrar sarantayaskañatakiki. Ukatsti, Post-alfabetización uk utjayapxarakitayna, Educación Primaria (EBA) ukjam sutini: irpitirinakataki, yaticht'irinakatakis yatxatäwinakaw juk'amp yatintapxañapatak utjarakïtayna.

SAAD San Gabriel utt'asïwipa

Waranqa llätunk patak kimsaqalqtunk suxtani maranxa, Hno. Jaime Calderón Manrique jupax irptirjam sutinchatäkatayna ukjaxa, Sistema de Autoeducación de Adultos a Distancia ukaw phisqha maranak yant'añatak utt'ayatätayna, Resolución Ministerial 1136 tunka paqalqun urunak saraqkipan llumpaqa phaxsina. Ukat paqalq urunak saraqkipana anata phaxsin waranqa llätunk patak payani maranxa, mä qilqat taypirakiw Resolución Ministerial 195 chiqpach utt'ayatäxatayna. Pä arut arst'asir aymar markachirinakar yanapt'añ amtampi. Uka machaq yatichäwi-yatiqäwi wakiskir amtasti taqinitakiw wali askïtayna, qilqat pankanak taypiw yatichäwinak qhanstayatätayna: ayllu, ayni uka pä aski amtanak jach'añchayasina.

Jan armkay luräwinaka

Waranqa llätunk patak llätunk tunk payani maranxa, nayrïr kuti yatiqäwinak tukt'ayir jila kullakanakax "Hno. Jaime Calderón Manrique" uka suti apapxatayna. Uka marasti suxtaniw yatiqäwinakap tukt'ayapxatayna: pusi kullaka ukjamaraki pani jilanaka. Markachirinakax uk yatisaxa, taqiniw muspharata qhipartapxatayna ukjamarus p'arxtapxarakitaynawa. Ukjam uñjasasti, p'iqinchir jila kullanakar yatxatawix, juk'ampiw departamento de La Paz suyunakana ukjamaraki Cochabamba markans yapxattawayatayna. Sum amuyt'añatakisti, akïr jamuqanak uñjapxañäni:

Kunapachati, "AYMARANAKAX KIMSÏR WARANQ MARANXA, TAQINIW AYMARAT ULLT'ASIR QILLQT'ASIRÏPXAÑASA" ukjam amuyump taqi chaqar Radio taypi purt'atäkatayna ukjaxa, jank'akirakiw kunaymäni-tuqinakan pä tunk payani "Centros de Estudio" satanakäki ukanakax utt'asiwayatayna.

Kamachinaktuqita

Reforma Educativa kamachi Nº 1565, paqalqu urunak saraqkipan willka kuti phaxsin, waranqa llätunk patak llätunk tunk pusini marata, ukanx akjam qhanañchi: "Educación Alternativa yatichäwi-yatiqäwix kawkïr jila kullakanakati jan yatiqäwinakap tukuyawayapki jupanakar yanapt'añataki utt'ayatawa" sasina.

Mä qilqatan "convenio Marco, Estado - Iglesia" ukan sarakiwa: Iglesiax kunaymän luräwinak yatichäwi-yatiqäwi taypin sarantayi sasina. San Gabriel Radiox Iglesiankiritjamax jayanakana, ayllunakana, jach'a markanakans Sistema de Autoeducación de Adultos a Distancia uka taypiw yatichäwinkampi aymara - qhichwa markachirinakar yatichi, amuyt'ayi ukjamaraki nayrar sartayi.

Jach'a amta

Aymar markachirinakaxa, taqinis purapat yanapt'asis ullañ qilqañ yatintapxañanakasa, janiw jan ullt'asirix utjañapäkiti, Bolivia marka irptirin amtanakaparjam phuqhasina, saräwinakasarjama ukjamaraki maynit maynikam yäqasisina.

Phuqhasir amtanaka

  • Ayllunakanxa, taqinis ullañ qilqañ yatintapxañapatak amuyt'ayaña.
  • Purapat yanapt'asis ullañ qilqañ nayraqatar sarantayaskañaki ayllu, ayni ukanak jach'añchayasina.
  • Aymar aru, aymar saräwi juk'amp jach'añchayaña.
  • Pisin jakañat mistuñatakixa, kunaymäni achüwinaka, amparamp luratanak juk'ampink utjayaña.
  • Qullan arunaktuqi markachirinakar amuyt'ayaña, yatiyaña taqinis mä wawak jakasipxañasataki.

Phuqhäwinaka, lup'ïwinaka

Sistema de Autoeducación de Adultos a Distancia ukax kunjamati aymar markan saräwinakapax utjki, jäkäwipas kunjamasa ukjmarjam sartayatawa, aymar arut kastill arut yatichasina, markachirnakas jupanakpachp ayllunakans, mä utjäwins nayrar sartapxañapataki. Uka aski amtanakasti akïrinakan qhanstaraki:

Saräwituqinakat yatxatäwi, kunati Bolivia markasan kunaymän saräwinaka, arunakaw utjki ukanak ch'amañchi, uñt'ayarakisa.

Pä arut yatxatäwi, aymar arut ukjamaraki kastill arut yatichasina, arsüwituqit qilqäwituqir mäkipayxañataki.

Taqikun yatxatäwi, qilqatanak taypi markachirinakar luräwinaktuqita, qullasiñtuqita, yäqasiwtuqita, kunaymän achunak sum puquyañtuqita yaqhanakampit jupanakatak aski yatintayaña, amuyt'atayaña.

Khitinakarus yanapt'i

Kawkïr markachirinakati yapumpi, uywampi La Paz departamento markana, Cochabamba departamento markana, Oruro markan qamasirinakaru, jupanakar ullañ qilqañax yaticht'ata yanapt'ata, kunjamati saräwinakapax utjki ukjamarjama. Ukampis jupanakax yatiqañ tukt'ayañ amtanïpxiwa, nayrar sartañ kunkimpi. SAAD San Gabriel amtanakapax utjki ukar phuqhañataki.

Kunjamas SAAD San Gabriel utt'ayata

SAAD San Gabriel akjamat utt'ayatawa: jilïr p'iqinchiri, Ministerio de Educación ukjamaraki Iglesiat khithapa. Subdirección, aruskipt'irinakapa ukjamaraki qulqi apnaqir yanapt'irimpi chikt'ata jupanakaw askinjam nayrar sarantañatak irnaqapxañapaxa.

Yatichirinakasti, Centros de Estudio p'iqinchir jila kullakanakar amuyt'ayapxañapa, yatxatäwinakamp sarantapxañapa ukjamaraki yatiqir jila kullakanakarus yatichapxañapa. Ukat irpirin yanapiripasti (secretaria), kunanakati jupan lurañanakapax phuqhañäki ukanak lurasaraki. Ukatxa, Apoyo Radial uka wakichäw taypiw kunapachas yant'äwinakax apasini, kuna urunakas yatxatatäni taqi ukanakat yatiyataraki, ukjamarus ullañ qilqañas yatichatarakiwa.

Derechos Reservados © Radio San Gabriel 2011 - 2017
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia