INFORMACIÓN REFERENCIAL
Sección Radio San Gabriel
Temática Historia
Idioma Aymara
Ver en idioma Castellano

RADION UTT'ASÏWIPA
Qilqirinaka: Clemente Mamani ukjamaraki radio San Gabriel-tuqin irnaqirinakapa

Janïr utt'askasa

San Gabriel Arcángel Radiox tunka phisqhan urunak saraqkipan achuqa phaxsina, waranqa llätunk patak phisqha tunk phisqhani maranaw Peñas qarqa markan utt'asiwayatayna, pä aski amtanakampi: tatitun arunakap jach'añchayaña ukjamaraki aymar markachirinakar ullañ qilqañ yatintayaña. Padre Bernardo Ryan, Sacerdote Maryknoll jupaw Radio irptirjamax ukjam amuyunakamp sarantayatayna. Ukapachanakan jupax uka pachpa markan Párroco ukjamätaynawa. Trámites ukanakampis askinjamaw Radion sum sartayañapatak irnaqawayarakitayna.

Radio San Gabriel en la localidad de Peñas - Prov. Los Andes

Ukat urunakas, phaxsinakas mäkirakiw saraqawayxatayna. Radiosti, tansmisor de 250 watios ukja ch'amampikiw mä motor eléctrico yanapt'apamp wayrar mistsutayna. Equipos ukanakax Parroquiatätaynawa, janiw Radionkkataynati.

Pä tunk urunak saraqkipan qasäwi phaxsina, waranqa llätunk patak phisqha tunk suxtani maranaw San Gabriel Arcángel Radion jach'a equiponakapax mä solemne acto litúrgico ukan ch'allxatt'awayatäxatäna, Nuncio Apostólico Monseñor Humberto Monzonni jupan p'iqinchata. Uka wakichawinsti, Papa Pio XII jupan mä qilqata apayanit ullaratayna, machaq equiponakar bendición luqtasa. Ukatsti, kimsaqalq waranqa aymaranakaw chikañchasiwayapxatayna ukjamaraki Arzobispo de La Paz Mons. Abel Antezana jupas ukankawayarakitaynawa.

Ukat qhiparusti, sapüruw wakichawinakax Radiotaypi wayraru misttayatätayna: tatitun arunakap jach'añchayasina ukjamaraki ullañ qilqañ yatintäwinaks jiwasan jakäwisarjam yatcht'asina. Ukatsti, radiox sum wayrar misttañapatakix pä generadores de tres kilowatios ukaw alatäxatayna. Ukjamarus pä tunka receptores pre-sintonizados ukanakaw kunaymani Centros ukanakar lakiratäxatayna, kunti yatintasipkäna ukanakat markachirinakar yatiyañataki.

Tunka phisqhan urunak saraqkipan achuqa phaxsina, waranqa llätunk patak phisqha tunk paqalquni maranaw Radiox sumpach utt'asiwayxatayna: Teresa Ormachea de Siles Primera Dama de la Nación jupas purt'aniwayarakitaynawa. Ukampisa, San Gabriel Arcángel Radiox Padre Bernardo Ryan jupan p'iqinchatätaynawa, wakichaw yatiyirinakasti: Luis Cadena, Walter Cadena, Daniel Bustillos ukjamaraki Demetrio Miranda operador de Estudio Máster.

Waranqa llätunk patak phisqha tunk llätunkan maranxa, transistores a batería ukjamaraki a pila ukanakaw puriyataxatayna, departamento de La Paz ukch'pachan wayramp chikt'at misttañataki ukjamaraki Perú jak'a markanakansa. Uka pachpa mararakiw transmisor de 500 watios ukjamaraki antena de 300 pies ukch'a tupun uskutäxarakïtayna. Taqi uka equiponakax Servicio de Informaciones de los Estados Unidos markataw apayanitätayna.

Uka pachpa maran qasäwi phaxsina, Diego Pruss, Padre Maryknoll jupaw Radio irpxarxarakitayna, jupasti generador móvil uk utt'ayarakitayna; CARE jupanakan apayanita pataka transistores de onda fija ukanak taqiwjar lakirarakitayna.

Waranqa llätunk patak suxta tunk payani maranxa, juk'amp ch'ampiw wayratuqir misttxarakïna, ukjamarusa walja utanakaw yäpar irnaqañatak luratäxarakïtayna.

Tunka urunak saraqkipan mara t'aqa phaxsina, waranqa llätunk patak suxta tunk kimsani maranxa, nayrar sartañapatakix uraq papelanakapasti suma q'umachatäxataynawa, ukjamat Radiox wali ch'amampi sartañapataki: yatichäwi-yatiqäwi jach'añchayasa ukjamaraki jan kuna qulqs apsusa. Ukjam amtawinakasti juk'ampiw ch'amañcharakïna. Ukjamäkipanaw, Diego Pruss Radio irptiri ukjamaraki Luis Cadena jupampi Colombia anqäx markar Sutatenza Radion irnaqäwinakap uñt'ir sarawayapxatayna.

Ukat pä urunak saraqkipan mara t'aqa phaxsina, waranqa llätunk patak suxta tunk pusini maranaw San Gabriel Radiox Personería Jurídica ukjamaraki Resolución Suprema Nº 125451 sum sartxañapatak katuqawayxatayna.

San Gabriel Radio irptiri Padre Diego Pruss Colombia anqa markat kutt'anisasti, transmisores de 500 a 1000 watios ukjamar juk'amp jayanakar misttañapatak yapxatawayatayna.

Waranqa llätunk patak suxta tunk suxtani maranxa, Radiox pä chiqan irnaqañ qalltatayna: Radyükapunisti Peñas markanaw qhipartatayna. jach'a equiponaka, transmisores, mezcladora ukjamaraki antenas ukanakas kikiparaki. Estudios de grabación ukjamaraki yatichirinaka jach'a markaruw jutawayxapxatayna, Parroquia de San Pedro ukjar utt'ayasisa; qhiparusti, Cuna ukjana, ukatsti, local de la calle "Juvenca" ukanarakiw utt'asxapxatayna.

ERBOL

Willka kuti phaxsina, tunka kimsaqalqun urunakäkipana, waranqa llätunk patak suxta tunk paqalquni maranxa, San Gabriel Radio, Cochabamba markat San Rafael Radio ukjamaraki Oruro markata Pio XII Radio, taqi jupanakaw mä Centro de Comunicación Católica utt'ayañ amtapxatayna: "Escuelas Radiofónicas de Bolivia ERBOL" uka sutimpi, mä aski amtäwimpi: ullaña, qilqaña, saräwinaka, k'umar jakäwi, yatichäwi-yatiqäwi, yatiyäwinaka juk'ampinakat markachirinakar yatiyañataki.

Uka pachpa marana, pä tunk kimsaqalquni urunak saraqkipana jallu qallta phaxsinxa, Bolivia markan jilïr irptiripax ERBOL uka radiorux mä qilqata taypiw (Resolución Suprema) sum sarxarxañapatak utt'ayawayxatayna.

Waranqa llätunk patak suxta tunk llätunkani maranxa, yaqha irptir utt'ayapxatayna: Padre Daniel Hemesath jupaw pachpa amtäwinakamp sarantas San Gabriel Radio irpxarxatayna.

Ukat waranqa llätunk patak paqaltunka maranxa, San Gabriel Radiompi ukjamaraki ERBOL radiompix mä qilqata Ministerio de Educación y Cultura jupanakampi rixintawaypxatayna, ukjamat jilïr jila kullakanakataki: ullaña, qilqaña yatichäwinakamp sarantañataki, ukjamaraki Radio taypis yatichasiñapataki; jach'a markanakan irnaqir yatichirinakampi, jayanakan irnaqir yatichirinakampi chikt'ata.

Waranqa llätunk patak paqaltunk mayani maranxa, Radiox paqalqu kilowatios ch'amampiw wayrar mistawayxatäna. Ukat jach'a equiponakapas juk'at juk'ataw Parroquia Cristo Rey zona Alto Sopocachi ukjar apatäxatayna; uka Iglesia manqhanaw Willka kuti phaxsikam waranqa llätunk patak paqalqtunka mayani maran utt'ayatätayna.

Uka pachpa mararakiw Radiox juk'ampi ch'amanchasïna mä Centro utt'ayasina: Centro de Aymaristas de Medios de Comunicación Social (CAMCOS) ukjam sutimpi. Ukan chikañchasipxänwa: San Gabriel Radio, Escuelas Radiofónicas San Gabriel, Centro de Producción de Películas ukjamaraki "Gabrielito" qilqatasa; Bolivia markan jilïr irptir amtawinakapar ullañ qilqañ juk'amp ch'amañchasa.

Waranqa llätunk patak paqalqtunk payani maranxa, San Gabriel Radiox aynacharuw (ciudad de La Paz) sum utt'asxatayna.

CAMCOS

Radio San Gabriel en El Alto

"Centro de Aymaristas de Medios de Comunicación Social CAMCOS" jupanakax yatichir yanapirinakaruw yatichapxäna, amuyt'ayapxäna sum irnaqapxañapataki. Ukatakisti, akïr yatichirinakaw chhijllatäpxana: Melitón Mullisaca, Anibal Lanza, Laurentino Ríos, Enrique Tarqui, Jorge Balboa, Casimiro Condori, Isidora Huayta, Delia de Cuentas, Javier Tito Espinoza yaqhanakampi. Apoyo Radiofónico akïr jila kullakankaw sarantayaparakitayna sarantayasipkarakïnwa: Walter Chambilla, Nicolás Quiñones, Luis Cadena, Freddy Sossa, Medardo Pary, Quintín Choquetarqui, Juan Quino, Nelly Peredo, Rosa Ajjpi, Norma Oblitas, Elías Claros yaqhanakampi.

Ukat tunka phisqhan urunak saraqkipan mara t'aqa phaxsinxa, Salón Cristo Rey ukanx qallarasiwayataynawa: Escuelas Radiofónicas de San Gabriel marpach yatichawimp sarantaña. Ukarux purt'aniwayapxataynawa: Ministro de Educación Mario Méndez, Arzobispo de La Paz, Jorge Manrique, Embajador de Unión Soviética Alexei Servachevich ukjamaraki waranqats jila markachirinaka, irptirirnaka juk'ampinakaw taqituqit purintaniwaypxatayna. Uka pachpa ururakiw CAMCOS jupanakax nayrïr aymar arut qilqata "GABRIELITO" uk luqt'awayxapxatayna, wali aski uñanchäwinakani ukjamaraki yatichäwinakani.

Waranqa llätunk patak paqalqtunk kimsani maranxa, walja Departamento de La Paz suyunakanaw Sucursales de CAMCOS ukanakax utjawayxäna. Ukapachparaki Departmento de Potosí uksansa.

Ukatxa akïr yatichirinakarakiw yapt'asiniwayxarakïna: Raúl Tambo, Germán Nina, ángel Choque, Elías Salguero, Juan Paravicini, Germán Mena, Emiliana Rojas de Ayaviri, Nelly de Chambi, Policarpio Vásquez juk'ampinaka. Uka pachanakax Radiox Padre Donald Steed Congregación Maryknoll jupanakan apnaqatäskanwa.

Ukampirusa, uka pachpa mararakiw llätunka urunak saraqkipana mara t'aqa phaxsina Planta de Transmisión equiponakax zona Ch'ijini Grande Viachatuqir sarañar apatäxatayna, ukjamarus 10 kilowatios ukja ch'amampi.

San Gabriel Radion mä jach'a amtawipax akïrinwa: suni pata uraqinakan qamasir jila kullanakar pachpa ayllunakapan yanapt'aña jan jupanakax jach'a markakam jutasipkañapataki. Ukat uka pachpa mararakiw kawkïr yatichirinakati ullaña, qilqaña yatichapkäna jupanakan ítems satäki ukanakas Gobierno-tuqir kutkatayatäxatayna.

Waranqa llätunk patak paqalqtunk pusini maranxa, Escuelas Radiofónicas San Gabriel ukax sutip mayjt'ayawaytaynawa: San Gabriel Radio uka suti apxarakitäna. Ukapachanakax Padre Donald Steed jupaw Radio irptaskarakïna. Ukat jupasti mä asistente técnico chhijllawayatayna: Pastor Evangélico Bautista Martín Chiri juparu, jupaw mayampi Gobierno-tuqinkirinakamp ítems yatichirinakatak mayiñataki aruskipt'atayna. Ukjamäkipanaw Julio Quispe yatichirir jupamp irnaqañapatak jawillt'atayna, qhiparusti yatichiri Max Sucojayu juparus jawillt'arakitaynawa.

Waranqa llätunk patak palqtunk phisqhani maranxa, walja mayjt'awinakaw irnqawtuqins, wakichäwituqinakans utjatayna. Akïri jila kullanakaruw irnaqirinakjam katuqatätayna: María Chirinos, Arturo Archondo, Demetrio Miranda, Jacinto Mamani, Lina Casas ukjamaraki yatichiri Lucio Flores.

Waranqa llätunk patak paqalqtunk suxtani maranxa, San Gabriel Radiox taqituqin uñt'ata, ist'ata ukjamäxataynawa, ukat Maryknoll Tatakuranakax markanakapar sarxañ amtxapxatayna, Arzobispado de La Paz Mons. Jorge Manrique jupar Radio katuyxasa. Ukjam irpirjamäsax Hermanos de las Escuelas Cristianas de La Salle jupanakampiw aruskipt'atayna, Visitador Hno. Jaime Calderón jupan p'iqinchata. Ukat jupax Radio irpxaruñ iyawsataynawa ukampirusa, Hno. José Canut jupan sutip San Gabriel Radio irptirïñapatakix arsuwayatayna.

Taqi ukanakat uñakipatäñapatakix janikiw jank'achasiwaykataynati, ukjamäkipanxa, mä juk'a pachanakatak Dr. Humberto Calderón Manrique juparuw Radio irptirjam utt'ayapxatayna. Machaq irptiristi, kunjamäkiti Radion amtäwinakapax ukjamarjamaw sarantayarakitäna.

Waranqa llätunk patak paqalqtunk paqalquni marana, pä tunk kimsaqalqun urunak saraqkipan sata qallta phaxsitxa, Hno. José Canut Saurat jupaw San Gabriel Radio irptirjamax España anqa markat puriniwayxatäna. Ukapachanakasti, Radion irnaqirinakapax tunka mayanikïpxataynawa.

Ukat jank'akirakiw mä qilqata chiqpach irptirïñapatakix rixintawayapxatayna: Arzobispo de La Paz Mons. Jorge Manrique Propietario San Gabriel Radiota, Hno. José Carrillo Bolivia markan Visitador de las Escuelas Cristianas de La Salle ukjamaraki Hno. José Canut Saurat San Gabriel Radio irptirjama. Visitador jupasti akjam uka qilqatan arst'awayarakitayna: "Bolivia markan Hermanos de las Escuelas Cristianas de La Salle jupanakax Hno. José Canut juparux San Gabriel Radio irptirïñapatakix jaysapxiwa, ukampirusa jupax La Salle ukankiripuniwa, Distrito de Barcelona - España uksata".

Waranqa llätunk patak paqalqtunk kimsaqalquni maranxa, Hno. José Canut machaq irptirjamaxa, Radio jach'aptayañ amtatayna, ukat periodista Jaime Archondo yanapt'apampix aski luräwinak wakichäwituqinakansa, yaqhanakansa sartawayapxatayna.

Uka pachpa maraxa, akïr Radion irnaqir jila kullanakan aski luräwinakapaw qhanstarakïna: Eva Ana Gutiérrez, Calixta Canaviri, René Gutiérrez Choque, Genaro Condori, Lina Casas, María Chirinos, Martha Portugal, Teresa Canaviri; yatichirinakatsti: Julio Quispe, Max Sucujayu, Walter Troche, Máximo Catari, Flora Arias taqi jupanaka.

Qasäwi phaxsina, waranqa llätunk patak paqalqtunk llätunkani maranxa, yatichirinakatakix paqalqu ítems ukjaw jikiratäxarakïna: Facundo Espejo, Joaquín Pérez, Vicente Cahuaya, Emiliana Rojas, Rosa Carranza, Emilio López ukjamaraki Mario Huañapaco jupanakaw irnaqir purt'aniwayxapxäna.

Uka pachpa maran lapaka phaxsinxa, San Gabriel Radiox juk'amp ch'amampiw wayrar mistxatayna, markachirinakar yanapt'asa, amuyt'ayasa, qhanañachasa ukjama. Kunati uka maranakax Bolivia markan jan wali amtanakaw Gobierno-tuqit utjarakïna. Manq'añanakan chaninakapa, gasolina, diesel yaqha yänakan chaninakapax urut urutjamaw irxatxäna. Thathinakaw jist'antantata uñjasxatayna. Ukjam jan walt'awinak utjkipansti, San Gabriel Radiox walipuniw markachirnakar micrófono taypi Bolivia marka irptirinakar k'umisa, qhuru arunakampi, kunti amuyapki ukanak arst'ayarakitäna. Ukjam arsuyatapaw wali juchäxana, Hno. José Canut San Gabriel Radio irptirirux Gobierno taypit juchañchawayapxataynawa. Ukampisa, Radio irptirix jilïr p'iqinchirinakarux kawkjanti jan walt'awinakax utjkäna ukjaruw uka jan walt'awinak pachpar sayt'ayxañatak irpxarawayatayna.

Jan walt'awinakax juk'ampikiw urut urjam jan askichkayäxataynati. Tunka paqalqun urunak saraqkipan willka kuti phaxsina, waranqa llätunk patak kimsaqalq tunka maranxa, San Gabriel Radiox kimsa phaxsinakaw amukt'ayata uñjasitayna, Luis García Mesa Tejada jupan p'iqinchata, ukjamarus kawkjanti Radiox utt'atäkäna ukjanx pallapallanakamp q'ala muyuntatäxataynawa.

Waranqa llätunk patak kimsaqalqtunk mayani maranxa, San Gabriel Radiox "aymar markan arupa" ukjam sutimpix nayraqatar sartaskakitaynawa. Kunaymäni wakichäwinakampi yatichäwinakampi, luräwinakampi: yap yapuchaña, juk'amp jach'a uywanak jilayaña yaqhanakampi. Taqi ukanakax kawkïr jila kullakanakati p'iqinchirinakjam chhijllatäpkäna jupanakaw yatichapxarakïna.

Ukat, waranqa llätunk patak kimsaqalqtunk payani maranxa, Mons. Jhon Luis May Arzobispado de San Luis de los Estados Unidos, Padre Luis Casey ukjamaraki Madre Ellen Rosse jupanakaxa mä uraq Av. General Lanza Nº 2001 Alto Sopocachituqin utanakanpach churapxatayna. Ukjamat Radiox ukan utt'asxañapataki, wayrarus sum mistxañapataki.

Waranqa llätunk patak kimsaqalqtunk kimsani maranxa, San Gabriel Radiox 20 kilowatios ukja ch'amampiw thaya uraqinakana, llaphi uraqinakana ukjamaraki junt'u uraqinakans wayrar misttxatayna.

Waranqa llätunk patak kimsalqtunk pusini maranxa, chiqpachapuniw nayrïri Sucursal del Correo Campesino mä qilqat taypi utt'awayxapxatayna, Mario Carrasco Marin Dirección General de Correos irptiripampi ukjamaraki Hno. José Canut Saurat San Gabriel Radion irptiripampi.

Pä tunk paqalquni urunak saraqkipan llumpaqa phaxsina waranqa llätunk patak kimsaqalqtunk suxtani maranxa, Hno. Jaime Calderón Manrique jupax Sistema de Autoeducación de Adultos a Distancia mä qilqat taypi utt'asïwip katuqawayxatayna (RM 1136 del 27/08/86). Ukasti, mä aski amtampiw utt'awayapxatyna: kawkïr jila kullakanakati jan yatiqäwi yatiqañ utanakan tukuyawayapki, jupanakan yatiqäw tukuyxapxañapatak utt'ayatätaynawa.

Waranqa llätunk patak kimsaqalqtunk paqalquni marana, pusi urunak saraqkipan willka kuti phaxsina, "ESCUELA IRPA TAYKA CHOQUENAYRA" uk utt'ayarakitayna, khaysa suyu Ingavi uksatuqina Hno. José Canut Saurat San Gabriel Radio p'inchirixa, ukaruw markachirinakax ch'ukuña, ch'uxña achunak achuyaña yaqhanankampit yatxatir jutapxani sasinaw utt'ayatayna.

Waranqa llätunk patak kimsaqalqtunk llätunkani marana, pä tunk pusin urunak saranqkipan willka kuti phaxsinxa, "GRANJA ESCUELA COCHUNA" uk utt'ayarakitayna, khaysa Coroico markana Nor Yungas suyutuqina, uka kikpa amtäwinakampiraki; ukarusti anqa markat yanapt'irinakax ch'allxatt'añatak purt'anipxarakitaynawa: MANOS UNIDAS yaqhanakampi.

Ukat, uka pachpa maranarakiw tunka paqalqun urunak saraqkipan jallu qallta phaxsinxa, Proyecto "JAYMA KURMI" ukaw Choquenayra markan ch'allxatt'atäxarakitayna; Lic. Jaime Paz Zamora Bolivia marka jilïr irptiripas purt'anirakitaynawa.

Waranqa llätunk patak llätunk tunkani marana, tunka mayan urunak saraqkipan anata phaxsinxa, "Planta de Electrificación Solar" pä patak familynakatak ch'allxatt'atarakitayna. Janiw ukakïkataynati yaqhanakampiw anqa markanakan yanapt'apampix luratätayna.

Waranqa llätunk patak llätunk tunk mayani maranxa, San Gabriel Radiox España anqa markanx pisin jakasirinakar yanapt'atapata, saräwinak jach'añchayatapata. "Premio Iberoamericano Bartolomé de las Casas" uk katuqawayarakitayna.

Waranqa llätunk patak llätunk tunk phisqhani maranxa, San Gabriel Radiox pusitunka maranak phuqxatayna, ukampirus aymar markar yanapt'añ amtampix nayraqatar sarantaskakïnwa: qullan arunaka uñt'ayasa, ullaña qilqaña yatichasa ukjamaraki saräwinaktuqitsa. Radion irnaqirinakapas niy taqpachaniw aymar arut arst'asiñ yatipxarakïna.

Tunka llätunkan urunak saraqkipana achuqa phaxsita, waranqa llätunk patak llätunk tunk paqalquni maranxa, San Gabriel Radio irptiri Hno. José Canut Saurat jupaw España anqa markan jan mayampitak alaxpach awkin jak'apar sarawayxatayna. Ukjam llakin jikxatasisinsti mä semanpachaw Radiox llakimpi chikañchasitayna, janiw wakichäwinakas wayrar mistkataynati, wali jach'a llakipunitaynawa. Ukampirus anqa markan jiwäwipatxa, janiw kunjamas jank'ak sarañjamäkanti, jan ukasti akanakiw kunjmati aymar markan saräwinakapax utjki ukjamarjam wakt'ayapxatayna. Ukjam llakimp chikañchasiwayasasti, Hno. Jaime Calderón Manrique jupaw Radio irptirjamax sarxarxutayna.

Hno. José Canut Saurat jupax nayrïr Televisión Aymara uraqpachan uñt'atäñatak wayrar qhanstayaña amtanipunïtaynawa.

Hno. Jaime Calderón irptirjam sarxarxusaxa, Radion utt'atapx mayjt'ayataynawa: pä subdirecciones ukjam utt'ayasa: mayasti SAAD-tuqina, mayasti Radiotuqinaraki; ukampirusa Departamentos ukanakx mä juk' mayjt'ayarakitaynawa: Planificación, Lengua Aymara, Pastoral, Cultura Aymara, Dibujo, Relaciones Públicas, Librería, Comunicación Educativa, Publicidad, Contabilidad ukjamaraki Producción-Sonoteca.

Anata phaxsina, pä waranq mayan maranxa, San Gabriel Radiox La Paz markat Altu pata markaruw utt'ayatäxatayna, Plaza de la Cruz Nº 100 zona Amig Chaco ukjana, wakichäwinakapas janiw amukt'ayatäkarakïnti wayrar misttaskakïnwa. Ukjamarusa oficinas ukanakas janiw jisk'akïxanti jach'anakäxanwa, ukjarusti mä jach'a Teatro ukjamanïxarankïnwa, kimsaqalqpatak qunuñanakani (800 butacas).

Pä waranqa kimsani maranxa, jiskt'äwinakaw wakt'ayatätayna, kawkjakamas Radiox wayrampi chikt'ata ist'asi uk yatiñataki. Uka qilqatanaktaypisti yatisitaynawa: San Gabriel Radiox La Paz, Oruro, Potosí uka markanakkamaw wayrampi chikt'ata puritayna. Ukjamarus jutïrinakanxa Bolivia markapachan ist'asxañapataki. Norte de Chile ukjamaraki Perú markana Titicaca quta thiyanakans ist'asirakitaynawa:

Radiox paya kasta ondas ukjamanakampiw wayrar misttatayna: Onda Media 25 kilowatios ukja ch'amani, 620 kilohertz frecuencia ukampi; yaqhasti Onda Corta 5 kilowatios ukja ch'amani 6080 kilohertz frecuencia ukampi ukjamaraki banda sonora de 49 metros.

Uka pachpa marana tunka urunak saraqkipan sata qallta phaxsinxa, Bolivia markan jan walt'awinkanaw utjawayäna, kunati Jilïr p'iqinchir mallkuw kunaymäni mayïwinakar jan phuqhawaykänti, markachirinakasti taqiwjanakan thakhinak jist'antapxäna.

Ukat Gobierno-tuqinkirinakax Teatro San Gabriel markachirinakamp aruskipt'añatak achikt'asipxatayna, ukarusti purt'aniwayapxataynawa: Confederación Sindical única de Trabajadores Campesinos de Bolivia, Federación Departamental única de Trabajadores Campesinos de La Paz, Tupac Katari ukjamaraki Federación de Mujeres Bartolina Sisa juk'ampinaka, walt'atanipuniw tantachasipxatayna. Ukampisa janiw kuna amtäwirus puriwyapkataynati, markachirinakasti wali thithitaw manq'at mutuñar phisqha semananak mantapxatayna, Gonzalo Sánchez de Lozada jupar jaqsuñkama. Uka jan walt'awisti, tunka paqalqun urunak saraqkipan taypi sata phaxsinaw utjawayäna pä waranq kimsani marana.

Pä waranq pusini maranxa, San Gabriel Radiox "Educación Alternativa" wali ch'amampiw nayraqatar sarantayarakïna, ukampis mä COMPLEJO DE EDUCACIóN ALTERNATIVA utjayarakïna, kunaymäni wakichäwinakamp chikañcht'asisa ukjamaraki panka qilqatanakampi (Unidades temáticas), tiwanaku chimpunak uñacht'ayasa. Choquenayransti kullakanakar yaticht'asina, jach'a uywanaka uywañtuqit yachicht'asina ukjamaraki Comunidades Eclesiales de Base ukan p'iqinchir jila kullakanakarus yatxatayatarakïnwa.

Suxta tunka yatichirinakaw Educación Alternativa ukan irnaqapxatayna ukjamaraki pusitunka yanapt'irinaka (técnicos, administrativos) yaqhanakampi.

Pä waranqa phisqhani maranxa, San Gabriel Radiotakix wali wakiskiri maränwa, kunati tunka phsiqhan urunak saraqkipan achuqa phaxsinxa, PHISQHA TUNKA maranak phuqhawayarakïna BODAS DE ORO aymar markar yanpt'asina. Uka pachpa mararakiw Colegio La Salle Altu Pata markan utt'ayatarakïna.

Pä waranqa paqalquni maranxa, Evo Morales Ayma Bolivia markan Jilïr Mallkupa ukjamaraki álvaro García Linera jupanakaw San Gabriel Radio mä maramp amtt'askipan purt'anipxatayna. Ukatakisti, mä wakichäwi Teatro Bartolomé de las Casas ukan wakt'ayapxatayna: La Salle Machaq Jach'a Yatiqañ uta, Producción de Video ukjamaraki Biblioteca San Gabriel taqi ukanak ch'allxatt'añataki.

FM Color 101 Radio

Nayrïr urunak saraqkipan llumpaqa phaxsina, Waranqa llätunk patak kimsaqalqtunk phisqhani maranxa, Hno. José Canut jupax FM COLOR 101 Radio, Jach'a markanakan qamasir markachirinakar chuymanakap qhanartt'ayañataki, yatiyañataki, amuyt'ayañataki utjayawayatayna. Ukat jach'a markanakan qamasir markachirinakax walipuniw arumay uru isch'ukipxirïtayna.

FM COLOR Radiox wali ch'amampiw yatiyasa, yanapt'asa, amuyt'ayasa arumay uru wayrar misttarakitayna, kunjamäkiti jach'a markanakan jakäwix ukjamarjama. Radion irnaqirinakasti akïr jila kullakanakänwa: Ramiro Plata, Humberto Chavarría, Saúl Maldonado, Jackelin Gamio, Leonardo Ponce, Marco Antonio Noriega, Nila Ruiz, José Luis Aliaga, Oscar Pozo, Omar Gómez ukjamaraki Lucía Sauma jupan p'iqinchäwipampi. Ukampisa, wali ist'ata wakichäwinakax akïrinakarakïnwa: Concierto Boliviano, La Salsa ukjamaraki Rock Latinoamericano.

FM Color radion wali wakiskir luräwinakapa

Plaza Villarroel uksan kimsaqalq waranqa markachirinakamp chikt'ataxa Festival de Música Nacional ukaw apasiwayatayna: ukjamaraki wawanakataki Festival del Continente de la Esperanza. Ukat tunka suxtan urunak saraqkipan willka kuti phaxsinxa, mä wakichäwiw utt'ayatarakïtayna: "Conquistando la Ciudad" ukjam sutini, jach'a markan qamasirinakar jawillt'añataki: samart'añ urunakan taqins munkay chiqanakar sarapxañapataki.
Waranqa llätunk patak llätunk tunk kimsaqalquni maranxa, FM COLOR Radiox ERBOL Radioruw alxantatäxatayna. Jichhürunakkamasa, ERBOL uka sutimpiw Bolivia markapachan wayrar misttaskaraki.

San Gabriel Radiox aymar markan arupakïskiwa, wayrampi chikt'ata taqi chiqanakar purisa, markachirinakar amuyt'ayasina, yatichasina, p'arxtayasina ukjamaraki nayraqatar sartañ amtampi. Ukampirusa, internet taypiw uraqpachan uñt'atäxani, ist'atäxarakinisa; wakichäwinakapatsipansa ukjamaraki yaqhanakampi; taqinis jisawan saräwis uñt'apxañapataki yatintapxañapatakisa.

Derechos Reservados © Radio San Gabriel 2011 - 2017
Información: info@radiosangabriel.org.bo  - puebloaymara@radiosangabriel.org.bo
Webmaster: sistemas@radiosangabriel.org.bo   Portal Web: www.radiosangabriel.org.bo
El Alto, La Paz - Bolivia